Axborot xavfsizligi xalqaro standart asosida: Uztelecom’ning uchta yangi Cloud Hub markazi ISO/IEC 27001:2022 bo‘yicha sertifikatlandi

Uztelecomning ma’lumotlarni saqlash va qayta ishlash markazlari (Data Markazlari) va bulutli xizmatlar yo‘nalishidagi axborot xavfsizligini boshqarish tizimi mustaqil sertifikatlashtirish auditidan muvaffaqiyatli o‘tib, ISO/IEC 27001:2022 xalqaro standarti talablariga muvofiqligini tasdiqladi.

Sertifikatning amal qilish doirasiga kompaniyaning quyidagi uchta yangi ma’lumotlarni qayta ishlash markazi kiritildi:

• Cloud Hub Kokand — Farg‘ona viloyati;
• Cloud Hub Bukhara — Buxoro viloyati;
• Cloud Hub Tashkent — Toshkent viloyati.

Mazkur sertifikat ushbu markazlarda ma’lumotlarni qayta ishlash va bulutli xizmatlarni ko‘rsatish jarayonlari Uztelecomning yagona axborot xavfsizligini boshqarish tizimiga kiritilganini hamda xalqaro talablarga muvofiq tashkil etilganini tasdiqlaydi.

ISO/IEC 27001:2022 nima?

ISO/IEC 27001:2022 — axborot xavfsizligini boshqarish tizimiga qo‘yiladigan talablarni belgilovchi xalqaro standart.

U faqat alohida texnik himoya vositalari mavjudligini baholash bilan cheklanmaydi. Standartda axborot bilan ishlashning butun tizimiga e’tibor qaratiladi: kompaniya ehtimoliy xavflarni qanday aniqlashi, vazifalar va javobgarlikni qanday taqsimlashi, axborotdan foydalanish huquqini qanday boshqarishi, hodisalarga qanday munosabat bildirishi, joriy etilgan choralar samaradorligini qanday nazorat qilishi hamda xavfsizlik jarayonlarini muntazam takomillashtirib borishi baholanadi.

Standart uchta asosiy tamoyilga tayanadi:

• maxfiylik — axborotdan faqat tegishli vakolatga ega foydalanuvchilar foydalanishi mumkin;
• yaxlitlik — ma’lumotlar ruxsatsiz o‘zgartirish, buzish yoki yo‘qotishdan himoyalanadi;
• mavjudlik — axborot va raqamli resurslar foydalanuvchilar hamda axborot tizimlariga zarur bo‘lgan paytda mavjud bo‘lishi kerak.

Boshqacha aytganda, bu uskunalarni bir marta tekshirish emas, balki texnologiyalar, ichki qoidalar, ish jarayonlari va mutaxassislar mas’uliyatini birlashtirgan, doimiy faoliyat yurituvchi yaxlit tizimdir.

Bu mijozlar va hamkorlarga nima beradi?

Korporativ mijozlar, davlat tashkilotlari va texnologik hamkorlar uchun ushbu sertifikat Uztelecom axborotni saqlash, qayta ishlash va uzatish bilan bog‘liq xavflarni tizimli ravishda boshqarishining qo‘shimcha va xolis tasdig‘idir.

Bu quyidagilarni anglatadi:

• uchta yangi Cloud Hub axborot xavfsizligi bo‘yicha yagona talablar asosida faoliyat yuritadi;
• xavflar muntazam ravishda aniqlanadi, baholanadi va nazorat qilinadi;
• axborotni himoya qilish jarayonlari mustaqil tekshiruvdan o‘tkaziladi;
• tizim samaradorligi doimiy tahlil qilinib, takomillashtirib boriladi;
• bulutli xizmatlar va ma’lumotlarni qayta ishlash markazlari xizmatlari xalqaro miqyosda e’tirof etilgan yondashuvlar asosida taqdim etiladi.

Bu, ayniqsa, korporativ tizimlari, axborot resurslari va boshqa muhim raqamli yechimlarini bulutli infratuzilmaga joylashtirayotgan tashkilotlar uchun katta ahamiyatga ega.

Bu mamlakat va jamiyat uchun nima sababdan muhim?

Bugun ma’lumotlarni qayta ishlash markazlari raqamli iqtisodiyotning tayanch bo‘g‘inlaridan biridir. Ularning infratuzilmasida axborot tizimlari, bulutli platformalar, biznes uchun servislar hamda minglab insonlar va tashkilotlar har kuni foydalanadigan boshqa raqamli mahsulotlar faoliyat yuritishi mumkin.

Hududlarda yangi Data markazlarining rivojlantirilishi zamonaviy bulutli xizmatlar geografiyasini kengaytiradi. Ularning xalqaro sertifikatlashtirish doirasiga kiritilishi esa axborot xavfsizligini boshqarish bo‘yicha yagona talablarni shakllantiradi. Bu milliy raqamli infratuzilmaga bo‘lgan ishonchni mustahkamlaydi va O‘zbekistonda raqamli xizmatlarni yanada rivojlantirish uchun ishonchli zamin yaratadi.

Bir martalik tekshiruv emas — doimiy nazorat

Sertifikat o‘tkazilgan audit natijalari asosida CERT INTERNATIONAL xalqaro sertifikatlashtirish organi tomonidan berilgan.

ISMS-2446/B-sonli sertifikat 2026-yil 26-avgustdan 2029-yil 5-mayga qadar har yilgi nazorat auditlaridan o‘tish sharti bilan amal qiladi. Bu standart talablariga muvofiqlikni faqat dastlabki tekshiruvda tasdiqlashning o‘zi yetarli emasligini, uni keyinchalik ham doimiy ravishda ta’minlab borish zarurligini anglatadi.

Uztelecom sertifikatining amal qilish doirasi telekommunikatsiya tarmoqlarini loyihalash, qurish va ekspluatatsiya qilish jarayonlarini boshqarish, telekommunikatsiya xizmatlarini ko‘rsatish, shuningdek, ma’lumotlarni qayta ishlash markazlari va bulutli xizmatlarni taqdim etishni qamrab oladi.

Uztelecom uchun bu shunchaki yangi hujjat emas. Bu izchil yondashuvning amaliy tasdig‘i: mamlakatning raqamli infratuzilmasi kengayib borar ekan, axborot xavfsizligi jarayonlari ham u bilan birga rivojlantirilmoqda.

Uztelecom
Barcha uchun texnologiyalar